COVID-19-ի դեմ չինական ապակտիվացված պատվաստանյութը հավանության արժանանալուց հետո կարող Է շուկայում հայտնվել այս տարվա դեկտեմբերի վերջին և կարժենա 144-150 ԱՄՆ դոլար:
Այդ մասին հայտարարել է Sinopharm պետական կորպորացիայի տնօրենների խորհրդի նախագահ, կուսակցական կոմիտեի քարտուղար Լյու Ցզինչժենը:
Ինչպես Լյու Ցզինչժենի խոսքը մեջբերում են միջազգային լրատվամիջոցները, ապրիլի 27-ին Պեկինի Կենսապատրաստուկների հետազոտական ինստիտուտն սկսել է ապակտիվացված պատվաստանյութի կլինիկական փորձարկումները.
«Հունիսի 28-ին հրապարակվել են կլինիկական փորձարկումների առաջին և երկրորդ փուլի արդյունքները, հունիսի 23-ին Sinopharm-ը Արաբական Միացյալ Էմիրություններում ձեռնամուխ Է եղել միջազգային կլինիկական փորձարկումների երրորդ փուլին: Միջազգային կլինիկական փորձարկումների երրորդ փուլի ավարտից հետո կարելի Է անցնել ապակտիվացված պատվաստանյութին հավանություն տալու փուլին, սպասում ենք, որ մինչև այս տարվա դեկտեմբերի վերջը պատվաստանյութը կկարողանա հայտնվել շուկայում»:
Վերջինիս խոսքով փետրվարի 16-ից կորպորացիան սկսել է պատվաստանյութի իմունոգենային հետազոտություն անցկացնել յոթ տեսակի փորձարարական կենդանիների, այդ թվում՝ սպիտակ առնետների, մկների, ծովախոզերի, մակակա կապիկների և ճագարների վրա, և ստուգել պատվաստանյութի արդյունավետությունը: Այնուհետև պատվաստանյութի փորձարկումներ են անցել ոչ մեծ խումբ մարդիկ, որից հետո սկսվել են կլինիկական փորձարկումները: Դրան զուգահեռ ապակտիվացված պատվաստանյութի հետազոտություններ են անցկացվել Ուհանի Կենսապատրաստուկների հետազոտական ինստիտուտի կողմից, որտեղ ապրիլի 12-ին տեղի են ունեցել կլինիկական փորձարկումների առաջին և երկրորդ փուլերը. հունիսի 16-ին հրապարակված արդյունքները, Լյու Ցզինչժենի խոսքով, վկայում են պատվաստանյութի անվտանգության մասին, ծանր կողմնակի ազդեցության ոչ մի դեպք չի գրանցվել, փորձի մասնակիցների մոտ պատվաստումից հետո մշակվել են հակամարմիններ, հաղորդել է ՌԻԱ Նովոստին: